ദേശീയ സ്‌കൂൾ കായിക മേള: ഒന്നാം സ്ഥാനത്തേക്ക് ഓടിയെത്തി കേരളം

സാംഗൂരിലെ കൊടും തണുപ്പിനെ മറികടന്ന് ദേശീയ സീനിയർ സ്‌കൂൾ കായിക മേളയിൽ കേരളം ഓവറോൾ കിരീടത്തിലേക്ക്. പെൺകുട്ടികളുടെ 4x 100 മീറ്റർ റിലേയിലും സ്വർണം നേടിയതോടെയാണ് കേരളം ഒന്നാം സ്ഥാനമുറപ്പിച്ചത്. ആൻസി സാജൻ തന്റെ അവസാന മീറ്റിൽ റിലേയിലൂടെ നാലാം സ്വർണം നേടി. ആൺകുട്ടികളുടെ 4×100 മീറ്റർ റിലേയിലും കേരളമാണ് ഒന്നാമത്.

ഇന്നലെയാണ് കേരളം 80 പോയിന്റ് നേടി ഒന്നാം സ്ഥാനം ഉറപ്പിച്ചത്. നാലാം ദിവസം മത്സരങ്ങൾ അവസാനിച്ചപ്പോൾ മൂന്ന് പോയിന്റ് മാത്രം മുന്നിലായിരുന്നു സംസ്ഥാനം. ഇന്ന് നടന്ന മത്സരങ്ങളിലൂടെയാണ് കേരളത്തിന്റെ സ്ഥാനമുറച്ചത്.

ഇന്ന് നടന്ന ആറ് ഫൈനലുകളിൽ രണ്ട് സ്വർണം, രണ്ട് വെളളി, രണ്ട് വെങ്കലം എന്നിങ്ങനെ കേരളത്തിന്റെ ചുണക്കുട്ടികൾ നേടി. ഹരിയാനയുടെയും മഹാരാഷ്ട്രയുടെയും വെല്ലുവിളികൾ മറികടന്നാണ് കേരളം മീറ്റിൽ എട്ട് സ്വർണം കരസ്ഥമാക്കിയത്.

national senior student athletic meet