തിരുവനന്തപുരം ജില്ലയ്ക്ക് ആശ്വാസം; പുതിയ കൊവിഡ് 19 പരിശോധനാ ഫലങ്ങൾ എല്ലാം നെഗറ്റീവ്

തലസ്ഥാന നഗരിക്ക് ആശ്വസിക്കാം ഇന്നു പരിശോധിച്ച കൊവിഡ് 19 ഫലങ്ങളെല്ലാം നെഗറ്റീവ്. വർക്കലയിൽ ഇറ്റലിക്കാരന് കൊവിഡ് 19 സ്ഥിരീകരിച്ച സാഹചര്യത്തിൽ കൊല്ലം ജില്ലയിലും റൂട്ട് മാപ്പ് പുറത്തിറക്കും. സംസ്ഥാനത്തെ കൊറോണ പ്രഭവകേന്ദ്രമായ പത്തനംതിട്ടയിൽ ഇന്നു വന്ന എട്ടു ഫലവും നെഗറ്റീവ് ആയിരുന്നു. 33 പേർ ആശുപത്രിയിലും 1232 പേർ വീടുകളിലും നിരീക്ഷണത്തിൽ തുടരുന്നുണ്ട്. ഫലങ്ങൾ നെഗറ്റീവ് ആണെങ്കിലും ഭീഷണി ഒഴിഞ്ഞിട്ടില്ലെന്ന നിലപാടിലാണ് ആരോഗ്യ വകുപ്പ്.

Read Also: കൊവിഡ് 19ന്റെ മറവിൽ കൊള്ള; മാസ്‌കുകൾ വൻ തോതിൽ വിദേശത്തേയ്ക്ക് കടത്തി

58 പേരുടെ നെഗറ്റീവ് ഫലങ്ങളാണ് തൃശൂരിൽ പുറത്തുവന്നത്. 1571 പേരാണ് നിരീക്ഷണത്തിൽ. ഇതിൽ 72 പേർ ആശുപത്രികളിലാണ്. ഇന്നലെ കൊവിഡ് 19 സ്ഥിരീകരിച്ച ആൾക്കൊപ്പം സഞ്ചരിച്ച എട്ട് മാസം പ്രായമുള്ള കുഞ്ഞിനേയും അമ്മയെയും ആശുപത്രിയിൽ പ്രവേശിപ്പിച്ചതിൽ കുഞ്ഞിന്റെ ആരോഗ്യനില തൃപ്തികരമാണ്. കണ്ണൂരിൽ കൊവിഡ് സ്ഥിരീകരിച്ചയാളുടെ ദുബായിലെ ഏഴ് സുഹൃത്തുക്കളെ കണ്ണൂർ ജില്ലാ ആശുപത്രിയിൽ ഐസൊലേഷൻ വാർഡിൽ പ്രവേശിപ്പിച്ചു. വർക്കലയിലെ റിസോർട്ടിൽ രോഗം സ്ഥിരീകരിച്ച വിദേശി കൊല്ലം ജില്ലയിലും യാത്ര ചെയ്തിട്ടുണ്ട്. ഇയാളുടെ യാത്രാവിവരങ്ങൾ ഉൾക്കൊള്ളിച്ചുകൊണ്ടുള്ള റൂട്ട് മാപ്പാകും പുറത്തിറക്കുക.

ഇറ്റലിയിൽ കുടുങ്ങിയ 21 മലയാളി വിദ്യാർത്ഥികൾ കൊച്ചിയിൽ തിരിച്ചെത്തി. ഇവരെ പരിശോധനയ്ക്കായി ആലുവയിലെ ആശുപത്രിയിലേക്ക് മാറ്റി. എറാണാകുളം ജില്ലയിൽ ഇന്നത്തെ പരിശോധനയിൽ 30 പേരുടെ സാമ്പിൾ നെഗറ്റീവ് ആണെന്ന് കണ്ടെത്തി. കോട്ടയത്ത് രോഗബാധ സ്ഥിരീകരിച്ച നാലുപേർ ഉൾപ്പെടെ 11 പേർ ആശുപത്രിയിലുള്ളത്. വൃദ്ധ ദമ്പതിമാരുടെ നില മെച്ചപ്പെട്ടു. കോഴിക്കോട് 61 ഫലങ്ങൾ നെഗറ്റീവാണ്. ഇനി ഏഴുപേരുടെ പരിശോധനാ ഫലം കൂടി ലഭിക്കാൻ ബാക്കിയുണ്ട്.

കാസർഗോഡ് ജില്ലയിൽ 10 പേർ ആശുപത്രികളിൽ നിരീക്ഷണത്തിലാണ്. കർണാടകയിലെ ഗുൽബർഗയിൽ നിന്നുള്ള വിദ്യാർത്ഥികളെ നാട്ടിലെത്തിക്കാൻ സംസ്ഥാന സർക്കാർ സംവിധാനമൊരുക്കിയതായി ഗതാഗത മന്ത്രി എകെ ശശീന്ദ്രൻ അറിയിച്ചു.

 

coronavirus, trivandrum

നിങ്ങൾ അറിയാൻ ആഗ്രഹിക്കുന്ന വാർത്തകൾനിങ്ങളുടെ Facebook Feed ൽ 24 News
Top