കൊവിഡ് രോഗികൾക്ക് ഓക്സിജൻ സാഹായവുമായി ”ഓക്സിജൻ ഓൺ വീൽസ്”

രാജ്യത്ത് കൊവിഡ് വ്യാപനം രൂക്ഷമായിക്കൊണ്ടിരിക്കുന്ന സാഹചര്യത്തിൽ പല സംസ്ഥാനങ്ങളും ​ഗുരുതരമായ ഓക്സിജൻ ക്ഷാമം നേരിട്ടുകൊണ്ടിരിക്കുകയാണ്. ഈ സാഹചര്യത്തിൽ കൊവിഡ് പോസിറ്റീവായ രോ​ഗികൾക്ക് അവരുടെ വീടുകളിൽ ഓക്സിജൻ എത്തിക്കാനുള്ള സംവിധാനം ഒരുക്കുകയാണ് പശ്ചിമബം​ഗാളിലെ സർക്കാരിതര സംഘടനയായ ലിവർ ഫൗണ്ടേഷൻ. ഓക്സിജൻ ഓൺ വീൽസ്’ എന്ന് പേരിട്ടിരിക്കുന്ന ഈ സംരംഭം പശ്ചിമബം​ഗാളിലെ ആരോ​ഗ്യവകുപ്പുമായി സഹകരിച്ചാണ് പ്രവർത്തിക്കുന്നത്. രണ്ട് ആംബുലൻസുകളിലായി സംഭരിച്ചിരിക്കുന്ന ഓക്സിജൻ ആവശ്യമുള്ള കൊവിഡ് രോ​ഗികളുടെ വീടുകളിൽ എത്തിച്ചു നൽകും.

”നിലവിൽ രണ്ട് ആംബുലൻസുകൾ ഓക്സിജനുമായി ന​ഗരത്തിലുടനീളം സഞ്ചരിക്കുന്നുണ്ട്. കൊവിഡ് പോസിറ്റീവായ രോ​ഗികൾക്ക് ഓക്സിജൻ ആവശ്യമാണെന്ന് അറിയിപ്പ് ലഭിച്ചാൽ അവരുടെ വീടുകളിൽ എത്തിച്ചു നൽകും.” ലിവർ ഫൗണ്ടേഷൻ അം​ഗം പാർത്ഥ മുഖർജി വ്യക്തമാക്കി.

നിരവധി കോളുകളാണ് ഒരു ദിവസം ലഭിക്കുന്നത്. എന്നാൽ എല്ലായിടത്തും എത്തിച്ചേരുക എന്നത് പ്രായോ​ഗികമല്ല. പക്ഷേ ഞങ്ങൾ പരമാവധി ശ്രമിക്കുന്നുണ്ട്. 24 മണിക്കൂർ ജോലി ചെയ്താലും ഞങ്ങൾക്ക് പരിമിതികളുണ്ട്. ചില ​രോ​ഗികൾ പരിഭ്രാന്തിയുള്ളവരാണ്. അത് നിരീക്ഷിച്ച് സാധ്യമായ എല്ലാ സഹായങ്ങളും അവർക്ക് നൽകുമെന്നും ലിവർ ഫൗണ്ടേഷൻ വ്യക്തമാക്കി. മെച്ചപ്പെട്ട ചികിത്സാ സൗകര്യങ്ങൾ ലഭിക്കുന്നത് വരെ രോ​ഗികൾക്ക് പ്രാഥമിക ചികിത്സ ഉറപ്പാക്കുക എന്നതാണ് ലിവർ ഫൗണ്ടേഷന്റെ ലക്ഷ്യം.

Story Highlights: Oxygen on Wheels: NGO to provide free oxygen