ഭർത്താവിനെ കൊലപ്പെടുത്തി മൃതദേഹം ഏഴാം നിലയിൽ നിന്ന് എറിഞ്ഞു; ഭാര്യയും മകനും അറസ്റ്റിൽ

മുംബൈയിലെ അംബോലി ഏരിയയിൽ 54 കാരനെ ഭാര്യയും മകനും ചേർന്ന് കൊലപ്പെടുത്തി. ആത്മഹത്യ എന്ന് വരുത്തിത്തീർക്കാൻ മൃതദേഹം കെട്ടിടത്തിന്റെ ഏഴാം നിലയിൽ നിന്ന് എറിഞ്ഞതായി പൊലീസ് അറിയിച്ചു. സംഭവത്തിൽ യുവതിക്കും മകനുമെതിരെ കൊലക്കുറ്റത്തിന് കേസെടുത്തതായും ഇരുവരെയും അറസ്റ്റ് ചെയ്തതായും പൊലീസ്.

കൊല്ലപ്പെട്ട ശന്തനുകൃഷ്ണ ശേഷാദ്രി ആത്മഹത്യ ചെയ്‌തതാണെന്ന് പ്രതികൾ പൊലീസിനോട് നേരത്തെ പറഞ്ഞിരുന്നു. മുമ്പും ഇയാൾ ജീവിതം അവസാനിപ്പിക്കാൻ ശ്രമിച്ചിരുന്നതായും ഇവർ ആരോപിച്ചു. എന്നാൽ അന്വേഷണത്തിൽ ഇവർ കള്ളം പറയുകയാണെന്നും തെളിവ് നശിപ്പിക്കാൻ ശ്രമിച്ചതായും പൊലീസ് കണ്ടെത്തി.

കുടുംബ തർക്കമാണ് കൊലപാതകത്തിന് പിന്നിലെന്ന് പ്രാഥമികാന്വേഷണത്തിൽ വ്യക്തമായതായി ഡെപ്യൂട്ടി കമ്മീഷണർ മഞ്ജുനാഥ് ഷിംഗെ പറഞ്ഞു. ഭാര്യയെയും മകനെയും അറസ്റ്റ് ചെയ്തിട്ടുണ്ടെന്നും കൂടുതൽ അന്വേഷണം നടത്തിവരികയാണെന്നും അദ്ദേഹം കൂട്ടിച്ചേർത്തു.

Story Highlights: man-killed-then-body-thrown-from-7th-floor