ട്വന്റിഫോറിന്റെ ക്യാമ്പെയ്‌നിൽ പങ്കാളിയായി സൗമ്യ സരിനും; വിഷുക്കൈനീട്ടം ഗൗരിലക്ഷ്മിക്ക് കൈമാറി

ട്വന്റിഫോറിന്റെ ക്യാമ്പെയ്‌നിൽ പങ്കാളിയായി ഡോ.സൗമ്യ സരിനും. തനിക്ക് ലഭിച്ച വിഷുക്കൈനീട്ടം സൗമ്യ ഗൗരി ലക്ഷ്മിക്ക് കൈമാറി. ഗൗരി ലക്ഷ്മിക്ക് വേണ്ടി സൗമ്യ സരിൻ തന്റെ പേജിലൂടെയും സഹായം അഭ്യർത്ഥിച്ചിരുന്നു. കേരളത്തിലെ പത്ത് ലക്ഷം ആളുകളെങ്കിലും നൂറ് രൂപ വീതം ഗൗരി ലക്ഷ്മിക്ക് കൈമാറിയാൽ കുഞ്ഞിനെ രക്ഷിക്കാൻ കഴിയുമെന്ന് സൗമ്യ സരിൻ ട്വന്റിഫോറിനോട് പറഞ്ഞു.

പാലക്കാട് കൊളപ്പുള്ളിയിലെ ലിജു-നിത ദമ്പതികളുടെ മകൾ ഗൗരി ലക്ഷ്മിക്ക് സഹായവുമായി ബസ് ഉടമകളും രംഗത്തെത്തിയിരുന്നു. ഇന്ന് കോഴിക്കോട്-മഞ്ചേരി റൂട്ടിലെ ബസ് ഉടമകൾ 11 ലക്ഷം രൂപ കുടുംബത്തെ ഏൽപ്പിച്ചു. തൊട്ടുപിന്നാലെ ഓൾ കേരളാ പ്രൈവറ്റ് ബസ് മെമ്പേഴ്‌സ് ഏഴ് ലക്ഷം രൂപ ഗൗരിയുടെ ചികിത്സയ്ക്കായി കൈമാറി.

ഗൗരിലക്ഷ്മിയുടെ ജീവൻ രക്ഷിക്കാനായി ഇനി നമ്മുടെ മുന്നിലുള്ളത് 9 ദിവസം മാത്രമാണ്. സ്‌പൈനൽ മസ്‌ക്കുലർ അട്രോഫി ബാധിച്ച ഗൗരിലക്ഷ്മിക്ക് രണ്ടാം പിറന്നാളിന് മുൻപ് മരുന്ന ലഭിക്കണം. മെയ് 2നാണ് ഗൗരി ലക്ഷ്മിക്ക് രണ്ട് വയസ് തികയുന്നത്. അതിന് ഒരാഴ്ച മുൻപെങ്കിലും മരുന്ന് ഓർഡർ ചെയ്ത് കുഞ്ഞിന് നൽകണം. എന്നാൽ മാത്രമേ മരുന്ന് ഫലിക്കുകയുള്ളു. അതുകൊണ്ട് തന്നെ ഗൗരിക്കായി പ്രത്യേക ക്യാമ്പെയിന് രൂപം നൽകിയിരിക്കുകയാണ് ട്വന്റിഫോർ.

വിഷു ദിനത്തിൽ ‘ഗൗരിക്കൊരു കൈനീട്ടം’ എന്ന ക്യാമ്പെയ്‌നിലൂടെ കേരളക്കരയോട് വിഷുനാളിൽ ഗൗരി എന്ന കുരുന്നിന് കൈനീട്ടം നൽകാൻ അഭ്യർത്ഥിക്കുകയാണ് ട്വന്റിഫോർ.

ACCOUNT NUMBER – 4302001700011823
IFSC CODE – PUNB0430200
PHONE – 9847200415

കഴിഞ്ഞ ദിവസമാണ് സ്‌പൈനൽ മസ്‌ക്കുലർ അട്രോഫി ബാധിച്ച ഗൗരിലക്ഷ്മിയുടെ ചികിത്സക്ക് പണം വേണമെന്ന വാർത്ത ട്വന്റിഫോർ പുറത്തുവിട്ടത്. തുടർന്ന് നിരവധി പേർ സഹായവുമായി എത്തി. എന്നാൽ 16 കോടി രൂപ വേണ്ടയിടത്ത് നിലവിൽ 8 കോടി രൂപ മാത്രമേ ലഭിച്ചിട്ടുള്ളു. ശേഷിക്കുന്ന 8 കോടി രൂപയ്ക്കായി കേരളത്തിന്റെ കനിവ് തേടുകയാണ് ഈ കുടുംബം. മരുന്നിന് ഓർഡർ നൽകാൻ 9 ദിവസത്തിൽ താഴെ മാത്രമേ ഇനി സമയമുള്ളു.

ഗൗരിക്കൊരു കൈനീട്ടം’; വിഷുദിനത്തിൽ ക്യാമ്പെയ്‌നുമായി 24; കുഞ്ഞിന്റെ ജീവൻ രക്ഷിക്കാൻ കൈകോർക്കാം GPay : 9847200415 [Liju KL]

Story Highlights: soumya sarin helps gouri lekshmi