9 അവശ്യ വസ്തുക്കളുടെ വിലവർധിപ്പിക്കാൻ പാടില്ല; അവശ്യവസ്തുക്കളുടെ വിലവർധനവ് തടയാൻ നടപടിയുമായി യുഎഇ

അവശ്യവസ്തുക്കളുടെ വിലവർധനവ് തടയാൻ നടപടിയുമായി യുഎഇ. സാമ്പത്തിക മന്ത്രാലയത്തിന്റെ അനുമതിയില്ലാതെ അരി, ഗോതമ്പ്, പാചക എണ്ണ, പഞ്ചസാര തുടങ്ങിയ 9 അവശ്യ വസ്തുക്കളുടെ വിലവർധിപ്പിക്കാൻ പാടില്ല. ഇറക്കുമതി ചെയ്യുന്ന വസ്തുക്കൾക്ക്​ നൽകിയിരുന്ന കസ്റ്റംസ്​ തിരുവ ഇളവ്​ നയത്തിലും മാറ്റം വരുത്തിയിട്ടുണ്ട്​.

അരി, ഗോതമ്പ്, പാചക എണ്ണ, പഞ്ചസാര, മുട്ട, പാൽ, പയർ, ഉത്പന്നങ്ങൾ, ബ്രഡ് എന്നിവയുടെ വില വർധനയാണ് അധികൃതർ തടഞ്ഞത്. ഈ ഉത്പന്നങ്ങളുടെ വില വർധിപ്പിക്കാൻ സാമ്പത്തികകാര്യ മന്ത്രാലയത്തിന്‍റെ മുൻകൂർ അനുമതി നേടണമെന്ന്​ അധികൃതർ അറിയിച്ചു. ഇത്​ സംബന്ധിച്ച പുതിയ നയത്തിന്​ യു.എ.ഇ വൈസ്​ പ്രസിഡന്‍റും പ്രധാനമന്ത്രിയും ദുബായി ഭരണാധികാരിയുമായ ശൈഖ്​ മുഹമ്മദ്​ ബിൻ റാശിദ്​ ആൽ മക്​തൂമിന്‍റെ അധ്യക്ഷതയിൽ ചേർന്ന കാബിനറ്റ് യോഗം​ അനുമതി നൽകി.

Read Also: റിപ്പബ്ലിക് ദിനാഘോഷങ്ങളില്‍ ഋഷി സുനക് മുഖ്യാതിഥി?; ചര്‍ച്ചകള്‍ നടക്കുന്നതായി റിപ്പോര്‍ട്ട്

സാധാരണക്കാരെ വിലവർധനവിൽ നിന്ന്​ സംരക്ഷിക്കാനും വിതരണക്കാരും ഉപഭോക്​താക്കളും ഉത്പാദകരും വിൽപ്പനക്കാരും തമ്മിലെ ബന്ധം കൂടുതൽ ഫലപ്രദമാക്കാനും ലക്ഷ്യമിട്ടാണ്​ പുതിയ നയം പ്രഖ്യാപിച്ചതെന്ന് അധികൃതർ വ്യക്തമാക്കി. അതേസമയം ഇതു പ്രാഥമിക പട്ടികയാണെന്നും വൈകാതെ കൂടുതൽ ഉത്പന്നങ്ങൾ അവശ്യവസ്തുക്കളുടെ പട്ടികയിൽ ഉൾപ്പെടുത്തുമെന്നും അധികൃതർ അറിയിച്ചു.

പ്രാദേശികമായി ലഭ്യമല്ലാത്ത ഉത്പന്നങ്ങൾ ഇറക്കുമതി ചെയ്യുന്നതിന് നികുതി ഈടാക്കില്ലെന്നതും പുതിയ തീരുമാനത്തിലുണ്ട്.

Story Highlights: UAE Retailers not allowed to hike prices of 9 basic commodities without approval