വയോധികയെ വീട്ടില്‍ നിന്ന് ഇറക്കിവിട്ട സംഭവം: വാര്‍ത്തയ്ക്ക് പിന്നാലെ ഇടപെട്ട് പട്ടാമ്പി നഗരസഭ
3 minutes Read
പാലക്കാട് പട്ടാമ്പിയില്‍ വയോധികയെ വീട്ടില്‍ നിന്ന് പുറത്താക്കിയെന്ന ട്വന്റിഫോര്‍ വാര്‍ത്തയില്‍ ഇടപെട്ട് പട്ടാമ്പി നഗരസഭ വൈസ് ചെയര്‍മാന്‍ ടിപി ഷാജി. വയോധികയുമായും കുടുംബവുമായും നഗരസഭ ബന്ധപ്പെട്ടു. ഇന്ന് രാത്രി വയോധികയെ സഹോദരന്റെ വീട്ടിലേക്ക് മാറ്റാനുള്ള തീരുമാനം ആയതായി നഗരസഭ വൈസ് ചെയര്‍മാന്‍ ട്വന്റിഫോറിനോട് പറഞ്ഞു. നാളെ ഇവരുടെ കുടുംബവുമായി ചര്‍ച്ച ചെയ്ത് വിഷയം പരിഹരിക്കും. രമ്യമായി പരിഹരിക്കാനായില്ലെങ്കില്‍ നഗരസഭ മറ്റ് സൗകര്യങ്ങള്‍ ഏര്‍പ്പെടുത്തും. വയോധികയെ സുരക്ഷിത സ്ഥാനത്തേക്ക് മാറ്റിയെന്നും ടിപി ഷാജി വ്യക്തമാക്കി. (Pattambi municipality action Naseema thrown out of sister’s house)
കഴിഞ്ഞ 18 വര്‍ഷമായി താമസിച്ചുവരുന്ന സഹോദരിയുടെ വീട്ടില്‍ നിന്നാണ് വയോധികയെ പുറത്തിറക്കി വിട്ടത്. പട്ടാമ്പി സ്വദേശി നസീമയെയാണ് സഹോദരി മറിയക്കുട്ടി വീട്ടില്‍ നിന്ന് പുറത്താക്കിയത്. കുടുംബസ്വത്ത് ഭാഗം വയ്ക്കുന്ന സമയത്ത് വയോധികയെ നോക്കാമെന്ന് വാക്കാലെ ഉറപ്പ് നല്‍കി സ്വത്തുക്കള്‍ വാങ്ങിയെങ്കിലും സഹോദരിയും കുടുംബവും ഈ വാക്ക് ലംഘിക്കുകയായിരുന്നു. നസീമയെ സഹോദരിയും വീട്ടിലെ മറ്റുള്ളവരും മര്‍ദിച്ചെന്നും പരാതിയുണ്ട്.
23-ാം തിയതിയാണ് നസീമയെ സഹോദരി വീട്ടില്‍ നിന്ന് ഇറക്കിവിട്ടത്. ഇന്ന് രാത്രി വൈകിയും ഇവര്‍ സഹോദരിയുടെ വീടിന് മുന്‍വശത്ത് കയറിക്കിടക്കാന്‍ ഒരു ഇടമില്ലാതെ വെറും നിലത്ത് ഇരിക്കുകയാണ്. തന്നെ മര്‍ദിച്ചത് പരാതിപ്പെടാന്‍ താന്‍ പൊലീസിനെ സമീപിച്ചിരുന്നതായി നസീമ പറഞ്ഞു. ഇന്നലെ തൊട്ടപ്പുറത്തുള്ള വീട്ടിലുള്ളവര്‍ തനിക്ക് കിടക്കാന്‍ ഇടം തന്നിരുന്നുവെന്നും നസീമ പറഞ്ഞു. സഹോദരിയുടെ വീടിന്റെ നാല് വശവും പൂട്ടിയിരിക്കുകയാണെന്നും നസീമ വിശദീകരിച്ചു.
Story Highlights: Pattambi municipality action Naseema thrown out of sister’s house
ട്വന്റിഫോർ ന്യൂസ്.കോം വാർത്തകൾ ഇപ്പോൾ വാട്സാപ്പ് വഴിയും ലഭ്യമാണ് Click Here
English