“വിജയങ്ങൾ ആഘോഷിച്ചും തോൽവികളിൽ ആശ്വസിപ്പിച്ചും അവർ ഒപ്പം നിന്നു”; നീരജ് ചോപ്രയുടെ ശക്തിയും പിന്തുണയും ഇവർ!!

ലോക അത്‌ലറ്റിക് ചാമ്പ്യൻഷിപ്പിൽ സ്വർണം നേടുന്ന ആദ്യ ഇന്ത്യൻ അത്‌ലറ്റായി നീരജ് ചോപ്ര. പുരുഷന്മാരുടെ ജാവലിൻ ത്രോയിൽ മത്സരിച്ച നീരജ് 88.17 മീറ്റർ എറിഞ്ഞാണ് ചാമ്പ്യൻഷിപ്പ് നേടിയത്.
ഒരു അത്‌ലറ്റിന്റെ വളർച്ചയിലും വിജയത്തിലും കുടുംബ പിന്തുണ പലപ്പോഴും നിർണായക ഘടകമായി മാറാറുണ്ട്. ഇന്ത്യൻ ജാവലിൻ ത്രോ താരം നീരജ് ചോപ്രയ്ക്കും സ്ഥിതി വ്യത്യസ്തമല്ല. 1997 ഡിസംബർ 24 ന് ഹരിയാനയിലെ പാനിപ്പത്ത് ജില്ലയിലെ ഖന്ദ്ര എന്ന ഗ്രാമത്തിലാണ് നീരജ് ജനിച്ചത്. ഇന്ത്യയുടെ ആദ്യ ട്രാക്ക് ആൻഡ് ഫീൽഡ് ഒളിമ്പിക് സ്വർണ്ണ മെഡൽ ജേതാവാകാനുള്ള യാത്ര അദ്ദേഹത്തിന്റെ അക്ഷീണമായ കഠിനാധ്വാനത്തിന്റെയും കുടുംബത്തിന്റെ അചഞ്ചലമായ പിന്തുണയുടെയും തെളിവാണ്.

ഇന്ത്യൻ ജാവലിൻ ചാമ്പ്യനായ നീരജ് ചോപ്ര 19 അംഗങ്ങളുള്ള കുടുംബത്തിൽ നിന്നാണ്. നീരജിന്റെ അച്ഛൻ സതീഷ് കുമാർ ഒരു കർഷകനാണ്. അമ്മ സരോജ് ദേവി ഒരു വീട്ടമ്മയും. ഇല്ലായ്‌മകളും പരിമിതികളും ഏറെ ഉണ്ടെങ്കിലും ചെറുകിട കർഷക സമൂഹത്തിൽ താരതമ്യേന അജ്ഞാതമായ ഒരു കായികരംഗത്ത് മികവ് പുലർത്തുന്നതിന് നീരജിനെ പിന്തുണച്ച് അവർ എല്ലായ്പ്പോഴും കൂടെ നിന്നു. അവർ തങ്ങളുടെ മകന്റെ അഭിനിവേശവും കഴിവും ആദ്യമേ തന്നെ തിരിച്ചറിയുകയും അത് വളർത്തിയെടുക്കാൻ തങ്ങൾക്കാവുന്നതെല്ലാം ചെയ്യുകയും ചെയ്തു. (The strength behind neeraj chopras win)

കർഷകനായ സതീഷ് കുമാർ കഠിനാധ്വാനത്തിന്റെ മൂല്യം മനസ്സിലാക്കി മകനിലും അത് പകർന്നുനൽകി. ഒരു ചെറിയ ഗ്രാമത്തിൽ നിന്നുള്ള ഒരാൾക്ക് അവ വിദൂരമാണെന്ന് തോന്നിയപ്പോഴും, തന്റെ സ്വപ്നങ്ങളെ പിന്തുടരാൻ അച്ഛൻ നീരജിനെ പ്രോത്സാഹിപ്പിച്ചു. അമ്മ സരോജ് ദേവിയും മകനൊപ്പം എല്ലാ പ്രതിസന്ധികളിലും ഉറച്ചുനിന്നു. വെല്ലുവിളി നിറഞ്ഞ സമയങ്ങളിൽ അവന് ആവശ്യമായ സ്നേഹവും പ്രോത്സാഹനവും നൽകി. അവന്റെ വിജയങ്ങൾ ആഘോഷിച്ചും തോൽവികളിൽ ആശ്വസിപ്പിച്ചും അവർ അവനൊപ്പം നിന്നു.

Read Also: “ചരിത്രനിമിഷത്തിലേക്ക് ഇന്ത്യയെ നയിച്ചവർ”; ഇന്ത്യയുടെ ചാന്ദ്ര ദൗത്യത്തിന് പിന്നിൽ പ്രവർത്തിച്ച ശാസ്ത്രജ്ഞർ

നീരജിന്റെ അമ്മാവൻ ഭീം ചോപ്രയും അദ്ദേഹത്തിന്റെ യാത്രയിൽ ഒരു പ്രധാന പങ്ക് വഹിച്ചിട്ടുണ്ട്. നീരജിന്റെ കഴിവ് തിരിച്ചറിഞ്ഞ ഭീം അവനെ പൂർണ്ണഹൃദയത്തോടെ പിന്തുണച്ചു. പലപ്പോഴും പരിശീലന സെഷനുകളിലും മത്സരങ്ങളിലും അവനൊപ്പം യാത്ര ചെയ്തു. തിരിച്ചടികൾ നേരിട്ടപ്പോഴും നീരജിന്റെ കഴിവിലുള്ള വിശ്വാസം അസ്തമിച്ചില്ല.

വെല്ലുവിളികൾ നിറഞ്ഞതായിരുന്നു നീരജിന്റെ യാത്ര. തന്റെ കരിയറിന്റെ ആദ്യ വർഷങ്ങളിൽ അദ്ദേഹത്തിന് നിരവധി വെല്ലുവിളികൾ നേരിടേണ്ടി വന്നു. എന്നാലും അദ്ദേഹത്തിന്റെ കഴിവുകളിലുള്ള കുടുംബത്തിന്റെ അചഞ്ചലമായ വിശ്വാസവും അവരുടെ നിരന്തരമായ പിന്തുണയും ഈ പ്രതിബന്ധങ്ങളെ തരണം ചെയ്യാൻ അദ്ദേഹത്തെ സഹായിച്ചു. നീരജിനു തങ്ങളാൽ സാധ്യമായ ഏറ്റവും മികച്ച പരിശീലനം ലഭിക്കുന്നുവെന്ന് അവർ ഉറപ്പുവരുത്തി.

ഇപ്പോൾ, മാതാപിതാക്കളുടെയും കുടുംബത്തിന്റെയും ശക്തമായ പിന്തുണയോടെ നീരജ് ചോപ്ര തന്റെ സ്വപ്‌നങ്ങൾ ഓരോന്നോരോന്നായി നേടിയെടുക്കുകയാണ്. ഒപ്പം തന്റെ മാതാപിതാക്കളുടെ ആഗ്രഹങ്ങളും നിറവേറ്റുന്നു. ഒരു കർഷക കുടുംബത്തിൽ ജനിച്ച നീരജിന്റെ വിജയം അദ്ദേഹത്തിന്റെ മാത്രമല്ല കുടുംബത്തിന്റെയും ജീവിതത്തെ മാറ്റിമറിച്ചു. മകന്റെ നേട്ടങ്ങളിൽ അവരുടെ കണ്ണുകളിലെ അഭിമാനവും സന്തോഷവും അളവറ്റതായിരുന്നു.

Story Highlights: The strength behind neeraj chopras win