‘സ്രാവുകള്‍ക്കൊപ്പം നീന്തുമ്പോള്‍’ നു പുറകെ അടുത്ത സര്‍വീസ് സ്റ്റോറിയുമായി ജേക്കബ് തോമസ്

മുന്‍ വിജിലന്‍സ് ഡയറക്ടര്‍ ജേക്കബ് തോമസിന്റെ സര്‍വീസ് സ്റ്റോറി വീണ്ടും പുസ്തക രൂപത്തില്‍. നേരിട്ട വെല്ലുവിളികള്‍,  കാര്യവും കാരണവും എന്നാണ് പുതിയ പുസ്തകത്തിന്റെ പേര്. ഷാര്‍ജ പുസ്തകോത്സവത്തില്‍ വച്ചാണ് പുസ്തകം പ്രകാശനം ചെയ്തത്. എം.എം.മണിയുടെ ഭാഷയും ശൈലിയും ഒരു മന്ത്രിക്ക് ചേർന്നതല്ലെന്ന് പുസ്തകത്തിലുണ്ട്. ഇ.പി.ജയരാജനെതിരായ ബന്ധുനിയമന കേസ് നിലനിൽക്കുന്നതാണന്നും ജേക്കബ് തോമസ് പുസ്തകത്തിലൂടെ പറയുന്നു. തനിക്ക് ക്രമസമാധാനം കൈകാര്യം ചെയ്യാന്‍ അറിയില്ലെന്ന് ചില മഹദ് വ്യക്തികള്‍ പ്രസ്താവിച്ചിട്ടുണ്ട്. പ്രശ്നങ്ങള്‍ ഉണ്ടായ ശേഷം ഇടപെടുന്നതോ അടിച്ചമര്‍ത്തുന്നതോ അല്ല കാര്യ ശേഷി, പ്രശ്നം ഉണ്ടാകാതെ നോക്കലാണത്. ഇന്റലിജന്‍സിനും പോലീസിനും ഇത് കഴിയണം. പൊതു ജനങ്ങളെ ബുദ്ധിമുട്ടിക്കാതെ ജാഥകള്‍ ക്രമീകരിക്കാമെന്ന് താന്‍ കൊച്ചിയില്‍ പോലീസ് കമ്മീഷണറായിരിക്കെ തെളിയിച്ചതാണെന്നും അദ്ദേഹം പറയുന്നു.