കൊലവിളി പ്രസംഗം; വിപിപി മുസ്തഫയ്‌ക്കെതിരെ കോണ്‍ഗ്രസിന്റെ പരാതി

കൊലവിളി പ്രസംഗത്തില്‍ സിപിഐഎം ജില്ലാ സെക്രട്ടറിയേറ്റ് അംഗം വി പി പി മുസ്തഫയ്‌ക്കെതിരെ പരാതിയുമായി കോണ്‍ഗ്രസ്. മുസ്തഫയ്‌ക്കെതിരെ കേസെടുക്കണമെന്നാമശ്യപ്പെട്ട് ഡിസിസി പ്രസിഡന്റ് എസ്പിക്ക് പരാതി നല്‍കി.

കാസര്‍കോട് രണ്ട് യൂത്ത് കോണ്‍ഗ്രസ് പ്രവര്‍ത്തകര്‍ കൊല്ലപ്പെട്ട സ്ഥലത്ത് ഒന്നരമാസം മുമ്പ് വിപിപി മുസ്തഫ നടത്തിയ കൊലവിളി പ്രസംഗത്തിന്റെ വീഡിയോ പുറത്തു വന്നിരുന്നു. പീതാംബരനെ യൂത്ത് കോണ്‍ഗ്രസ് പ്രവര്‍ത്തകര്‍ ആക്രമിച്ചതിന്റെ പശ്ചാത്തലത്തില്‍ കല്യാട്ട് നടത്തിയ പ്രസംഗത്തിലാണ് മുസ്തഫ കോണ്‍ഗ്രസ് പ്രവര്‍ത്തകര്‍ക്ക് എതിരെ കൊലവിളി നടത്തുന്നത്.

പാതാളത്തോളം തങ്ങള്‍ ക്ഷമിച്ച് കഴിഞ്ഞു. സഖാക്കളായ പീതാംബരനേയും സുരേന്ദ്രനേയും ഒരു പ്രകോപനവും ഇല്ലാതെ മര്‍ദ്ദിക്കുന്നത് വരെയുള്ള സംഭവങ്ങള്‍ ക്ഷമിക്കുന്നു. പാതാളത്തോളം ക്ഷമിച്ച് കഴിഞ്ഞു. ഇനിയും ചവിട്ടാന്‍ വന്നാല്‍ ആ പാതാളത്തില്‍ നിന്ന് റോക്കറ്റ് പോലെ സിപിഎം കുതിച്ച് കയറും. ഒരു കോണ്‍ഗ്രസുകാരനും ചിതയില്‍ വയ്ക്കാന്‍ പെറുക്കിയെടുക്കാന്‍ ബാക്കിയില്ലാത്ത വിധം ചിതറി പോകും. ഇതായിരുന്നു മുസ്തഫ പ്രസംഗത്തില്‍ പറഞ്ഞത്. ഇങ്ങനെയാണ് സിപിഐഎം പറഞ്ഞതെന്ന് ഇത് കേട്ട കോണ്‍ഗ്രസ്‌കാരനും കേള്‍ക്കാത്ത കോണ്‍ഗ്രസുകാരനും പറഞ്ഞ് കൊടുക്കണം. സിപിഎമ്മിന്റെ രീതി അറിയാമല്ലോ എന്നും മുസ്തഫ പ്രസംഗത്തില്‍ ചോദിക്കുന്നുണ്ട്.

ജനുവരി ഏഴിന് കല്യാട്ടാണ് വിപിപി മുസ്തഫ ഈ പ്രസംഗം നടത്തിയത്. പെരിയയിലെ കൊലപാതകത്തില്‍ സിപിഎമ്മിന് പങ്കില്ലെന്ന് നേതാക്കള്‍ ആവര്‍ത്തിക്കുമ്പോള്‍ തന്നെയാണ് ഇപ്പോള്‍ ഈ വീഡിയോ പുറത്ത് വന്നിരിക്കുന്നതും. പാര്‍ട്ടി നേതൃത്വം നേരിട്ട് കൊലയില്‍ ഉള്‍പ്പെട്ടിട്ടുണ്ടെന്ന സൂചന നല്‍കുന്ന വീഡിയോ ആണിത്.