കർണാടകയിലെ കൂട്ടരാജി; സ്പീക്കറുടെ നിലപാട് ഇന്നറിയാം

കർണാടകയിൽ രാജിവെച്ച കോൺഗ്രസ് -ജനതാദൾ എസ് എം എൽ എ മാരുടെ കാര്യത്തിൽ സ്പീക്കറുടെ നിലപാട് ഇന്നറിയാം. കുമാരസ്വാമി സർക്കാരിനെ പ്രതിസന്ധിയിലാക്കി കോൺഗ്രസിന്റെ പത്തും ജനതാദൾ എസിന്റെ മൂന്നും എം എൽ എ മാരാണ് രാജിക്കത്ത് നൽകിയത്. കോൺഗ്രസ് നിയമസഭാകക്ഷി യോഗവും ഇന്ന് ബംഗളൂരുവിൽ ചേരും.

കർണാടകയിൽ രാഷ്ട്രീയ നാടകവും റിസോർട്ട് രാഷ്ട്രീയവും തുടരുന്നതിനിടെ എല്ലാ കണ്ണുകളും സ്പീക്കറിലേക്കും ഗവർണറിലേക്കും. ഇവരുടെ നിലപാടുകളാകും ഇനി നിർണായകം

118 പേരുടെ പിന്തുണയോടെ ഭരണം നടത്തിയ കോൺഗ്രസ് – ജെഡിഎസ് സഖ്യകക്ഷി സർക്കാരിന് 15 പേർ പാലം വലിച്ചതോടെ പിന്തുണക്കുന്നവരുടെ എണ്ണം 103 ആയി ചുരുങ്ങി. ബിജെപിയെ പിന്തുണക്കുന്നവരുടെ എണ്ണം നൂറ്റി ഏഴും. വിമതരെ അനുനയിപ്പിക്കാൻ മന്ത്രിസഭാംഗങ്ങൾ കൂട്ടരാജി നൽകിയെങ്കിലും ഫലമുണ്ടായില്ല. നിയമസഭാ കക്ഷി യോഗത്തിൽ പങ്കെടുക്കാത്ത എം എൽ എ മാരെ അയോഗ്യരാക്കാനാണ് കോൺഗ്രസ് നീക്കം. കൂറുമാറ്റ നിരോധന നിയമം മറികടക്കാൻ എം എൽ എ സ്ഥാനം രാജിവെച്ച് ഉപതെരഞ്ഞെടുപ്പിൽ ജയിച്ചു വരാമെന്ന കണക്കുകൂട്ടലിലാണ് കോൺഗ്രസ് – ജെഡിഎസ് വിമതർ. ഇവരുടെ പ്രതീക്ഷകൾക്ക് അയോഗ്യതാ നീക്കം മങ്ങലേൽപ്പിക്കും. അയോഗ്യരാക്കിയാൽ ഇവർക്ക് ഉപതെരഞ്ഞെടുപ്പിൽ മത്സരിക്കാനാവില്ല. ഭൂരിപക്ഷം സഭാ തളത്തിൽ തെളിയിക്കാൻ ഗവർണർക്ക് മുഖ്യമന്ത്രിയോട് നിർദേശിക്കാം. ഏതായാലും സ്പീക്കറും ഗവർണറുമാണ് കർണാടക ക്ളൈമാക്സിൽ താരങ്ങളാവുക