അമിതാഭ് ബച്ചൻ ആശുപത്രിയിൽ
ബോളിവുഡ് താരം അമിതാഭ് ബച്ചൻ ആശുപത്രിയിൽ. മുംബൈയിലെ നാനാവതി ആശുപത്രിയിലാണ് ബച്ചൻ. കഴിഞ്ഞ മൂന്ന് ദിവസമായി ബച്ചൻ നാനാവതി ആശുപത്രിയിലാണെന്നാണ് വിവരം. ചൊവ്വാഴ്ച പുലർച്ചെ 2 മണിയോടെയാണ് അമിതാഭ് ബച്ചനെ ആശുപത്രിയിൽ പ്രവേശിപ്പിച്ചത്.
കരൾ രോഗത്തെത്തുടർന്നാണ് ബച്ചനെ ആശുപത്രിയിൽ എത്തിയതെന്ന് റിപ്പോർട്ടുകളുണ്ടെങ്കിലും സ്ഥിരീകരിച്ചിട്ടില്ല. ബന്ധുക്കൾ ബച്ചനെ സന്ദർശിച്ചതായും ചില ദേശീയ മാധ്യമങ്ങൾ റിപ്പോർട്ട് ചെയ്യുന്നു. കഴിഞ്ഞ വെള്ളിയാഴ്ചയാണ് അമിതാഭ് ബച്ചൻ എഴുപത്തിയേഴാം ജന്മദിനം ആഘോഷിച്ചത്.
Read also: അമിതാഭ് ബച്ചന് ലിവർ സിറോസിസ്; 75 ശതമാനം കരൾ പ്രവർത്തനരഹിതം
തനിക്ക് ലിവർ സിറോസിസാണെന്ന് വ്യക്തമാക്കി ബച്ചൻ തന്നെ നേരത്തേ രംഗത്തെത്തിയിരുന്നു. തന്റെ കരൾ 75 ശതമാനം പ്രവർത്തനരഹിതമാണെന്നും 25 ശതമാനം മാത്രമാണ് പ്രവർത്തിക്കുന്നതെന്നും ബച്ചൻ പറഞ്ഞിരുന്നു. ഹെപ്പറ്റൈറ്റിസ് ബി വൈറസാണ് ലിവർ സിറോസിസിന് കാരണമായത്. 1982 ൽ ‘കൂലി’ എന്ന സിനിമയുടെ ചിത്രീകരണത്തിനിടെ ബച്ചന് പരുക്ക് പറ്റിയിരുന്നു. രക്തം വാർന്ന നിലയിൽ ആശുപത്രിയിൽ പ്രവേശിപ്പിച്ച ബച്ചന് അറുപതോളം കുപ്പി രക്തം വേണ്ടിവന്നു. രക്തത്തിലൂടെയാണ് ഹെപ്പറ്റൈറ്റിസ് ബി വൈറസ് ബച്ചന്റെ ശരീരത്തിൽ പ്രവേശിച്ചത്. അത് ലിവർ സിറോസിസിന് കാരണമാകുകയായിരുന്നു.
