മരടിലെ ഫ്‌ളാറ്റുകള്‍ പൊളിക്കുന്നത് നിര്‍ത്തിവയ്ക്കാന്‍ സുപ്രിം കോടതിയില്‍ ഹര്‍ജി നല്‍കും

മരടിലെ ഫ്‌ളാറ്റുകള്‍ പൊളിക്കുന്നത് അടിയന്തിരമായി നിര്‍ത്തിവയ്ക്കാന്‍ സുപ്രിം കോടതിയില്‍ ഹര്‍ജി നല്‍കാന്‍ മരട് നഗരസഭാ കൗണ്‍സിലില്‍ തീരുമാനം. വീടുകള്‍ക്കുണ്ടാവുന്ന വിള്ളലുകളും നാശനഷ്ടവും കണക്കിലെടുത്താണ് നടപടി.

പ്രശ്‌നം സുപ്രിം കോടതിയുടെ ശ്രദ്ധയില്‍ കൊണ്ടുവരണം. ഇതിനായി അഭിഭാഷകരുമായി കൂടിയാലോചന നടത്തണം. അതേ സമയം ഇന്‍ഷുറന്‍സ് സംബന്ധിച്ച് ഇനിയും പൂര്‍ണ ധാരണയായില്ലെന്ന് നഗരസഭ സെക്രട്ടറി മുഹമ്മദ് ആരിഫ് ഖാന്‍ കൗണ്‍സിലിനെ അറിയിച്ചു.

പ്രദേശവാസികളുടെ ആശങ്ക സബ് കളക്ടറെ അറിയിക്കുമെന്നും സെക്രട്ടറി പറഞ്ഞു. സബ് കളക്ടര്‍ സ്‌നേഹില്‍കുമാര്‍ സിംഗ് യോഗത്തില്‍ പങ്കെടുക്കുമെന്ന് അറിയിച്ചെങ്കിലും വിട്ടു നിന്നു.