നിർഭയ കേസ് പ്രതികളുടെ ഡമ്മികൾ തൂക്കിലേറ്റി

നിർഭയ ബലാത്സംഗ കേസിൽ വധശിക്ഷയ്ക്ക് വിധിച്ച പ്രതികളുടെ ഡമ്മികൾ തൂക്കിലേറ്റി. പ്രതികളുടെ ഭാരം അനുസരിച്ച് കല്ലുകളും മറ്റും നിറച്ചാണ് ഡമ്മി നിർമിച്ചത്. പരീക്ഷണം വിജയകരമായിരുന്നതായി ജയിൽ അധികൃതർ അറിയിച്ചു.

ആരാച്ചാർക്ക് പകരം ജയിലിലെ ഒരു ഉദ്യോഗസ്ഥനാണ് ഡമ്മികൾ തൂക്കിയത്. ജനുവരി 22 നാണ് പ്രതികളുടെ വധശിക്ഷ തീരുമാനിച്ചിരിക്കുന്നത്. 22 ന് രാവിലെ ഏഴ് മണിക്ക് പ്രതികളെ തൂക്കിലേറ്റാനാണ് ഡൽഹി അഡീഷണൽ സെഷൻസ് കോടതി പുറപ്പെടുവിച്ച മരണ വാറണ്ടിൽ പറയുന്നത്.

അതേസമയം, തൂക്കിലേറ്റാൻ വിധിച്ച നാല് പ്രതികളിൽ രണ്ട് പേർ സുപ്രിംകോടതിയിൽ തിരുത്തൽ ഹർജി നൽകിയിരുന്നു. വിനയ ശർമ , മുകേഷ് എന്നിവരാണ് ഹർജി നൽകിയത്. ഹർജികൾ സുപ്രിംകോടതി ചൊവ്വാഴ്ച പരിഗണിക്കും.