മഹാരാഷ്ട്രയിൽ മൊബൈൽ ഫോൺ മോഷ്ടിച്ചുവെന്നാരോപിച്ച് യുവാവിനെ ആൾക്കൂട്ടം തല്ലിക്കൊന്നു

മഹാരാഷ്ട്രയിൽ ആൾക്കൂട്ടക്കൊല. മുംബൈയിൽ സാന്താക്രൂസിന് സമീപം മുക്താനന്ദ് പാർക്കിൽ വെള്ളിയാഴ്ചയാണ് സംഭവം നടന്നത്. സജ്ജാദ് ഖാൻ (30) എന്നയാളാണ് മരിച്ചത്. മൊബൈൽ ഫോൺ മോഷ്ടിച്ചുവെന്നാരോപിച്ചാണ് ആൾക്കൂട്ടം യുവാവിനെ ആക്രമിച്ചത്.

പാർക്കിന്​ സമീപത്തെ​ നിർമാണ സ്​ഥലത്തുവച്ച് മൊബൈൽ ഫോൺ മോഷ്​ടിക്കാനുള്ള ശ്രമത്തിനിടെ ഖാൻ​ പിടിയിലാകുകയായിരുന്നുവെന്നാണ്​​ റിപ്പോർട്ട്​. ക്രൂരമായി മർദനമേറ്റ സജ്ജാദ് ഖാൻ ഓ​​ട്ടോറിക്ഷയിൽ കയറിക്കിടക്കുകയായിരുന്നു. രാവിലെ ഓ​ട്ടോറിക്ഷ ഡ്രൈവർ വണ്ടിയെടുക്കാൻ എത്തിയപ്പോഴാണ്​ അബോധാവസ്​ഥയിൽ ഖാനെ കണ്ടത്​. തുടർന്ന് ആശുപത്രിയിൽ എത്തിച്ചുവെങ്കിലും രക്ഷിക്കാനായില്ല.

സംഭവവുമായി ബന്ധപ്പെട്ട്​ ആറുപേർക്കെതിരെ മുംബൈ പൊലീസ്​ കേസെടുത്തു. എന്നാൽ ഇവരെ അറസ്റ്റ്​ ചെയ്​തോ എന്ന കാര്യത്തിൽ വ്യക്തതയില്ല.