മൂന്ന് ഗോളുകളുമായി ഗോകുലം എഫ്.സി ലീഡ് ചെയ്യുന്നു

ഐ ലീഗില്‍ ഷില്ലോംഗിനെതിരായ മത്സരത്തില്‍ എതിരില്ലാത്ത മൂന്ന് ഗോളുകള്‍ക്ക് കേരളത്തിന്റെ ഗോകുലം എഫ്.സി ലീഡ് ചെയ്യുന്നു. ആദ്യ പകുതിയില്‍ ഒരു ഗോളിന് ലീഡ് സ്വന്തമാക്കി ഗോകുലം രണ്ടാം പകുതിയുടെ ആരംഭത്തിലും ഗോള്‍ കണ്ടെത്തി.

ആദ്യ പകുതിയുടെ 43-ാം മിനിറ്റില്‍ ഖാനി അഹമ്മദ് നീഗത്തിലൂടെയാണ് ഗോകുലം ലീഡ് കണ്ടെത്തിയത്. ഫ്രീകിക്ക് പാസ് ഇടം കാലുകൊണ്ട് ഷില്ലോംഗിന്റെ ഗോള്‍ വലയിലേക്ക് എത്തിക്കുകയായിരുന്നു നീഗം ചെയ്തത്. രണ്ടാം പകുതിയുടെ ആരംഭത്തിലും ഗോള്‍ കണ്ടെത്താന്‍ ഗോകുലത്തിന് സാധിച്ചു. മത്സരത്തിന്റെ 56-ാം മിനിറ്റിലായിരുന്നു അന്റോണിയോ ജര്‍മനിലൂടെ ഗോകുലം രണ്ടാം ഗോള്‍ സ്വന്തമാക്കിയത്. മികച്ച ഷോട്ടിലൂടെയായിരുന്നു അന്റോണിയോ ജര്‍മന്‍ ഗോള്‍ സ്വന്തമാക്കിയത്.

രണ്ടാം ഗോള്‍ സ്വന്തമാക്കി പത്ത് മിനിട്ടുകള്‍ പിന്നിടുമ്പോള്‍ ഗോകുലത്തിന്റെ മൂന്നാം ഗോളും പിറന്നു. 66-ാം മിനിറ്റില്‍ എസ്. രാജേഷിലൂടെയായിരുന്നു ഗോകുലത്തിന്റെ മൂന്നാം ഗോള്‍ പിറന്നത്. ഷില്ലോംഗ് ലജോംഗ് എഫ്.സി മൂന്നാം ഗോള്‍ കൂടി പിറന്നതോടെ പ്രതിരോധത്തിലായിരിക്കുകയാണ്.