നാറാത്ത് ആയുധ പരിശീലന ക്യാമ്പ്; ഒളിവിലായിരുന്ന പ്രതി അറസ്റ്റിൽ

കണ്ണൂരിലെ നാറാത്ത് ആയുധ പരിശീലന ക്യാമ്പ് നടത്തിയ കേസിൽ ഒരാൾ അറസ്റ്റിൽ. കേസിൽ പ്രതിയായി ഒളിവിൽ കഴിയുകയായിരുന്ന മുണ്ടോൻവയൽ കണിയാറക്കൽ തൈക്കണ്ടി അസ്ഹറുദീൻ(23) ആണ് എൻഐഎയുടെ പിടിയിലായത്. നാല് വർഷമായി ഒളിവിലായിരുന്നു ഇയാൾ.

കലാപം ലക്ഷ്യമിട്ട് 2013 ഏപ്രിൽ 23 മുതൽ നാറാത്ത് തണൽ ചാരിറ്റബിൾ ട്രസ്റ്റിന്റെ കെട്ടിടത്തിൽ ആയുധ പരിശീലന ക്യാമ്പ് നടത്തിയെന്നാണ് കേസ്. കേസിൽ 21 പേർ കുറ്റക്കാരാണെന്ന് കഴിഞ്ഞവർഷം എൻഐഎ പ്രത്യേക കോടതി കണ്ടെത്തിയിരുന്നു. സംഭവത്തിന് തീവ്രവാദ പ്രവർത്തനവുമായി ബന്ധമുണ്ടെന്ന് കണ്ടെത്തിയതോടെ കേസ് എൻഐഎയ്ക്ക് കൈമാറുകയായിരുന്നു.